شعيب خميس/مشاهد بربس
بزاف من وليدات هاد الجيل ما يعرفوش بأنه كان واحد الفريق محيّح إسمو نهضة سطات فالبطولة المغربية لكرة القدم القسم الأول فالثمانينات و التسعينات من القرن الماضي.
هاد الفريق كان فريق بإمكانيات فقيرة بحالو بحال أي فريق د الكورة فالمغرب، تأسس في مدينة سطات سنة 1946 و ما كانش عندو حتى شي تاريخ كبير أو لعّابة كبار، بإستثناء لقب وحيد فكأس العرش ف 1969 و لقب البطولة ف 1971.
لكن سبحان مبدّل الأحوال، سطات غا يخرج منها أقوى بوليسي فتاريخ المغريب اللي غا يولّي من بعد أقوى و أشرس وزير داخلية فتاريخ المغريب.
إنه إدريس البصري يا سادة، اللي كان كيترعد منو البشر و الشجر و الحجر.
فالعهد ديالو كوزير داخلية، فريق مدينة سطات، فارس الشاوية، النهضة غا يتفتحوا ليه بيبان الخير من حيث لم يحتسب و غا يولّي فالمراتب الأولى فالبطولة و غا يجيب لعابة كبار و غا يدّي البطولة ف 1999 و يوصل لربع نهائي كأس الإتحاد الإفريقي لأول مرة ف 1997.
الكل كان كيتسابق باش يتهلاّ فالفرقة بالفلوس و الإشهار و السفريات و الرحلات باش يرضا عليه البصري.
تخيل مثلا أن عزيز أخنوش رئيس الحكومة الحالي كان كيعطي خمسين مليون سنتيم من جيبو شهريا للنهضة السطاتية.
تخيل مثلا أن الخطوط الجوية الملكية لارام كانت كتعطي 600 مليون سنتيم سنويا للفريق و كانت كتقوم بتشغيل اللعابة اللي كيساليو اللعب فمختلف الوظائف عندها، بالإضافة إلى رحلات سياحية للإستجمام ذهاب و إياب لأوروبا و مصر و الأراضي المقدسة فالسعودية لللّعابة و للطاقم الإداري و التقني ديال نهضة سطات باش غا يرضا إدريس البصري على لارام.
حتى لمقدمية و البوليس و المخبرين كانوا جنود مجندين وراء ادريس البصري باش فرقتو ديما تربح و تبقا الفوق الفوق، كانوا لمقدمية و الشيوخ كيجمعوا تقارير و معلومات على الفريق الخصم اللي غا تواجهو النهضة، شكون غا يلعب شكون ما غا يلعبش، شكون اللي مريض شكون اللي مضروب و كانوا كيسيفطو هاد التقارير لإدارة الفريق قبل يومين أو ثلاث باش يتاخذ اللازم و تربح نهضة سطات خوفا من إدريس البصري.
واحد العام الملك الراحل الحسن الثاني كان غا يجي لسطات، و كباقي الزيارات اللي كان كيقوم بيها العاهل الراحل لأي مدينة، كانت الدنيا كتقلب علاها على سفاها، حالة الطوارئ كنتوض أ معلم فهاد المدينة.
قبل داك النهار اللي كان غا يجي فيه الملك الراحل الحسن الثاني لسطات، النهضة السطاتية كان عندها ماتش فالبطولة، قرر الفريق ما يلعبش داك الماتش و أرسل برقية للفريق الخصم باش بلا ما يجي، لأن اللاعبين و الإداريين مشغولين بالتحضير لإستقبال صاحب الجلالة و المهابة.
الجامعة الملكية قبلات العذر و أجّلات داك الماتش و الأكثر من ذلك رسلات برقية لفريق نهضة سطات كتطلب منها تحديد النهار اللي يناسبها باش تلعب فيه هاد المقابلة المؤجلة.
ف 1999 غا يموت المغفور له الملك الحسن الثاني موراها بعام غا يتم الإستغناء عن خدمات إدريس البصري، و غا يبدا بنادم يقلب وجهو على نهضة سطات.
إختفى أخنوش و إختفت لارام، و إختفوا لمقدمية و الشيوخ و تركوا فريق نهضة سطات وحيدا يصارع قدره و مصيره الذي إنتهى بسقوط وراء سقوط من قسم إلى قسم حتى إنتهى به المطاف اليوم في غياهب النسيان، مرميا في القسم الثالث هواة كيلعب مع فريق الأحياء و أصبحوا بعض لاعبيه السابقين مشردّين متشردين، يقاومون الفقر و صعوبات الحياة.
أي تشابه في الأحداث بين فريق نهضة سطات و نهضة أخرى اليوم هو فقط من صميم خيال المؤلف.
